Idazmahaiaren aurrean egon naiz EGAko azterketa madarikatua prestatzen. Hiztegia G letratik zabaldu eta definizio harrigarriak topatu ditut orrialde hauetan. Luzea litzateke guztiak hemen berridaztea, baina Elhuyarren altxorra ezagutu behar duzuela uste dut, honela dio hitzez hitz;
Gazte Asanblada, gazte mugimendu ireki eta anitza da non gizarte ereduarekiko alternatibak eskeintzen diren modu autogestionatu batean.

Modu asanbleario edo asanbladaren bidez funtzionatzeak taldea osatzen duten kide guztien iritzia eta pentsaera, balio berdina dutela suposatzen du. Hau da, inor ez da beste inor baino gorago kokatzen eskema hierarkiko baten barnean.

Horrez gain, gazte asanblada ez da talde itxia, beti jende berria bateratzeko grinarekin baitago.
Asanbladaren bidez erabakiak hartzerako orduan erabiltzen den sistema, kontsensuan oinarritzen da,  eta beraz ez da bozkaketaren formula erabiltzen.

Autogestioa, bere filosofiaren barnean dagoen funtsezko oinarria da, independentzia ekonomikoak independentzia ideologikoari mesede egiten baitio. Gazte asanblada bere lana gestionatu eta kudeatzeko gai da instituzioen dirulaguntzen menpe bizi behar izan gabe.

Taldearen barruan lan talde ezberdinak sortzen dira ekintza ezberdinen antolaketa eta dinamizazioaz arduratzeko.

Gazte asanblada bat kritikoa da eta gizarte eredu ezberdin bat eraikitzea du helburu. Bere herrian dauden eta sortzen diren arazoei erantzuna emateko gaitasuna lortu nahi du, gizarte parte hartzea eta elkarlana sustatuz betiere.

Mahai gainean dagoen lexiko liburua begiratuz, -Hiztegi peto-petoa etxean daukadana- pentsatu dut. Hitzez ondo betea eta adierazpenez gainezka, bikaina edozein azterketa prestatzeko. Agian atariko probaren galderaren batean Gazte Asanblada gidoiarekin idazten den ala ez galdetuko dute, edo idatzizko azterketako gai izango da, edo akaso ahozkoan horri buruz hitz egin beharko dut...

Beno, egia esan ez dut uste hala izango denik, ezta mahai gainean daukadan hau hiztegi bat denik ere ez dut uste... Edo beharbada bai, hiztegia izango da, nire hiztegia, nire 3000 kuttuna, definizioez gain esanahia eta zentzua biltzen dituena. Guztiok duguna eta maizago irakurri eta sentitu beharko genukeena;  gure hiztegi honetatik Utopia hitza aspaldi ezabatu baikenuen, honen esanahia inoz ez baitugu ondo ulertu.