Borreroak baditu milaka aurpegi esaten zuen Fermin Muguruzak aspaldian, eta zoritxarrez esaldi honen baitan Euskal Herriko errealitate gordin bat ezkutatzen da. Errepresioak milaka aurpegi ditu: espetxeetan topatu ahal ditugunak, edota iheslari gisa atzerriko gordintasunean daudenak. Ehunka aurpegi ezagun eta ezezagunak errepresioaren sistema eta teknika desberdinak haien baitan sufritzen ari direnak.

Azkeneko asteetan kartzela barruan hainbat borroka piztu dira, eta gure herrietako kaleetan zehar ere mobilizazioak izan ditugu: haien artean 768 osasun arloko langileek sinatu eta kaleratutako agiria daukagu. Bertan gaur egun dagoen asistentzia mediko eskasa eta sarritan negligentea salatzeaz gain, egoerak txarrera egingo duen baieztapen larria irakur dezakegu. Alegia, gaur egun ezagutzen ditugun datuak beldurgarriak izanda ere, hurrengo urteetan okerrera egingo du: 740 euskal preso inguru daude, eta kopuru hau aldakorra bada ere, baiezta daiteke 182 presok gaixotasun fisikoren bat badaukatela, edo asistentzia psikologikoa jasotzen ari direla. Honek, orotara dagoen presoen laurdena suposatzen du. Are gehiago, horietatik %6.2ak gaixotasun larriren bat badauka momentu honetan.

Espetxeetan gaixotasunak milaka aurpegi ditu: heriotza zuzenean ezagutu duten 19 presok; gero eta ohikoagoak diren gaixotasun psikologiko eta psikiatrikoak, eta urteekin aurrera, kopurua ere goranzko norabidea hartzen duten gaixotasun fisikoak: diabetesa, bihotzekoak, artrosia, bularreko minbizia, giltzurrun, maskuriko minbizia etab luzea.

Milaka aurpegi bai, baina ez dugu inoiz ahaztu behar gaixotasun hauek guztiak pairatzen dituztenen aurpegien izen eta abizenak, besteak beste eta aipagarriak haien egoera larria eta sendaezina delako: Jon Agirre Agiriano, Jose Miguel Etxeandia Meabe, Jose Ramon Foruria Zubialdea, Gotzone Lopez de Luzuriaga Fernandez, Juan Jose Rego Vidal, Josu Uribetxebarria Bolinaga.

Milaka aurpegi behar ditugu kaleetan zehar, lantokietan, instituzioetan, eskoletan, unibertsitateetan … haien eskubideak bermatuak izan daitezen. Sano eta bizirik gure etxeetan nahi ditugulako. Borreroak milaka aurpegi izan ez ditzan.