Kazetari Kanaia Sopelan

Datorren ostiralean, hilak 17, Kurtzio Kultur Etxean 19:00etan hitzaldi irekia izango da “Kazetari Kanaia”rekin.

Igor Meltxorrek (Kazetari kanaia) garatzen ari den ikerketa kazetaritza proiektuaren aurkezpena egingo du.

Igor Politika Zientzietan lizentziatua, idazlea, politologoa eta Pepe Rey Elkartearen kidea da. Igorrek liburu batzuk idatzi ditu: Historia del abertzalismo virtual, Caso Bidegi, Gestión a la Vasca eta honez gain hainbat artikulu.

Errefuxiatuentzat oinetakoak jasotzeko azken eguna

Gaur errefuxiatuentzat oinetakoak jasotzeko azken eguna da.

Sopelan ere jasoketa hau aurrera eramaten gabiltza eta zure laguntza behar dugu. 

Jada erabiltzen ez dituzun eta etxean dituzun oinetako horiek balio handia dute oraindik pertsona askorentzat.

Mesedez, animatu eta praktikatu elkartasuna!

Zure laguntza ezinbestekoa da! 

Evasores, morosos y millonarios vascos. Aurkezpena Sopelan

“Evasores, morosos y millonarios vascos – Panamá Connections” liburuaren aurkezpena izango da Kurtzio Kultur Etxean urtarilaren 26an (osteguna) arratsaldeko 20.00etan.

Liburuaren idazlea, Ahoztar Zelaieta, Kurtzion izango da eta berak egingo du aurkezpena. Ahoztarrek Egin-en ikerketa taldean, Ardi Beltza eta Kale Gorria aldizkarietan eta kazetaritza ikerketako beste hainbat proiektutan aritu da. Bilbon, 1972an jaioa, kriminologia ikasitakoa da, eta Euskal Herriko lehen kriminologi elkarteko sorreran parte hartu zuen.

Sopelan 769 langabetu 2016. urtearen amaieran

Sopela.net-ek hiruhilero argitaratzen ditu langabeziaren datuak Sopelan; horrela, 2016. urtearen amaieran gure herrian 769 langabetu zeuden.

Emakume gehiago

769 langabetu hauetatik, 402 emakume eta 367 gizonak ziren. Adin tarteari dagokionez, 46 lagunek 25 urte baino gutxiago dute, 360 lagunak 25 eta 44 urte bitartekoak dira, eta azkenik 363 pertsonek dute 45 urte baino gehiago.

Kontratazioan prekarietatea nagusi

Argi dago kontratazioan prekarietatea nagusitzen dela; kontratazio mota aztertzen badugu, 2016eko abenduan 129 lan kontratu gauzatu dira Sopelan, eta horietatik 8 bakarrik behin betikoak izan dira eta aurretiaz zeuden behin behinekoen artean 10 bakarrik bihurtu dira behin betikoak; beste guztiak, alegia 111, behin behinekoak izan dira. Sektoreka aztertzen badugu, 87 kontratu zerbitzuetan izan dira; industrian 34 eta eraikuntzan 8.

Krisia gainditzen ari gara?

Datuek hainbat politikarien ahotan dagoen esamesa gezurtatzen dute. Azken urte hauetako datuak ikustea baino ez dago, hain zuzen ere, 2016ren amaieran izandako langabetuen kopurua 2015. urtean izandakoaren parekoa da.
2008ren amaieran, krisiaren hasieran nolabait esateko, 561 langabetu zeuden Sopelan
2009an............726
2010ean..........749
2011n..............788
2012an............902
2013an............889
2014an…...…...854
2015ean..........765
2016an........... 769
Langabeziak goia jo zuen Sopelan 2012an; baina gaur egun, oraindik ere, oso urrun gaude krisiaren aurreko datuetatik, eta azken bi urte hauetan ez da inolako hobekuntzarik sumatu.

2016ko datuak: langabeziaren datua oso egonkorra

Ikus daitekeenez langabezia oso egonkor mantendu da Sopelan urtean zehar. Urtarrila: 781 – otsaila : 792 – martxoa: 814 – apirila: 819 – maiatza: 785 – ekaina: 773 – uztaila: 773 – abuztua: 791 – iraila: 786 – urria: 790 – azaroa: 782 – abendua: 769

Datu hauek guztiak Espainiako Ministerio de Empleo y Seguridad Social-ak emandakoak dira. (SEPE, Sevicio Público de Empleo Estatal)