Jon Anzaren gorpua Euskal Herriko lurran dago eta milaka euskal herritarren maitasuna eta babesa jaso zuen. Ziburun egindako omenaldian, GARA egunkariaren agerkari digitalean zabaldu dutenaren arabera, Jon Anzaren bizitzari eta konpromezuari buruz mintzatzeaz gain, ETA erakundearen hiru kide eskenatokira igo ziren eta han bildutakoen txaloak eta babesa jaso eta gero idazki bat irakurri zuten.

ETAk euskal herritarrei "irabazteko anbizioarekin jarduteko" gonbidapena luzatu zien, erakunde armatuaren aburuz "inoiz baino gehiago Euskal Herriaren askatasuna herritarron esku dago eta." Haien interbentzioan une politiko honetara heltzea "zenbat kostatu duen denok badakigula" esan omen zuten eta horri esker Euskal Herriak aldaketa politikoa lortzeko aukera argia du eta horren bitartez bere ahotsa eta erabakitzeko eskubidea lortzeko aukera ere eskuragarria dela ondorioztatu zuten. Garai hauek "ez dira erresistentzia jardueretan gelditzeko, iniziatibaz eta ausardiaz jokatzeko baizik" bertan bildutakoei esan zieten.

Ekitaldian ere, Ezker Abertzale osoaren izenean beste interbentzio bat egon zen. Pertsona horrek ezker abertzaleak azken hilabete hauetan eztabaida sakona eta mamitsua burutu duela azpimarratu zuen. "Eztabaida horretan erabakiak hartu ditugu eta nahiz eta etsaiak intozikazioaren bitartez gure arteko zatiketa bilatu duen, ez dute lortu eta ez dute lortuko."

Herri aktibazioaren bitartez gaur egungo salbuespen egoera gainditzeko eta autodeterminazioa lortzeko bidea jorratuko dutela azpimarratu zuten. "Azken 50 urte hauetako borroka luzearen emaitza jasotzeko ordua da. Jon Anza eta bidean geratu diren beste lagunen helburuak lortzera goaz" esanez bere interbentzioa amaitu zuen.

Jon Anzaren omenaldia dela eta poliziek mugan izugarrizko kontrolak ipini zituzten eta kilometrotako karabanak sortu zituzten.