HIRUKA, Uribe Kostako astekariak argitaratu duen artikulua hitzez hitz kopiatzen dugu . Artikuluak Iker Rincon Morenok sinatzen du.

Urdulizko ospitaleak ekarriko dituen ondorioez kezkatuta, Uribe Ospitalea Plataforma aurkeztu berri dute, Urduliz Rurala eta SUSAN elkarteek osatutakoa. SUSAN sinadurak batzen hasi da, gaia Bizkaiko Foru Aldundira eroateko helburuagaz, besteak beste. Ospitalerako sarbideen inguruan erakundeek duten “deskoordinazioa” salatu dute, besteak beste.

Zer asmogaz sortu duzue plataforma?

Labur esateko, ospitaleak ekarriko dituen ondorio txarrak gutxitzeko eta onak indartzeko asmoarekin sortu dugu Uribe Ospitalea Plataforma. Era berean, Urdulizko ospitale berriaren irekierarekin kezkatuta dauden biztanleen bilgune izan nahi dugu.

Urdulizen bazebilen aspalditik Urduliz Rurala elkartea ospitalearen irekierarekin kezkatuta. Besteak beste, garraio publikoak, trafikoa eta aparkalekuaren udal kudeaketak edota irisgarritasunak kezkatzen zitzaien talde horretako partaideei. Urdulizko Udalera informazio eske joan arren, ez zuten inolako erantzunik jaso, nahiz eta kontsultarako ildo ofizialak jarraitu. Alkatetzatik erantzunik jasotzen ez zutenez, Udalean zeuden alderdi politikoengana jo zuten informazio eske.

Bestalde, Urduliz Rurala ezagutu barik, hainbat lagun elkartuta geunden Sopelan, SUSAN elkartearen izenpean. Ospitalaren irekierak Sopelan ekarriko zuen trafikoaren handitzearen ondorio kaltegarriak, segurtasunaren gutxitzea, zaratak, kutsadura edota udal egituren kaltetzearekin genbiltzan kezkatuta. Sopelako Udaleko alderdi politikoengana jo genuen gure kezkak zabaltzeko, baina ez genuen esperotako erantzunik jaso. Hain zuzen ere, alderdi hauetako bat, DB-TU, izan zen Urduliz Rurala gurekin harremanetan jarri zuena.

Hortaz, nortzuek osatzen duzue taldea zehazki?

Esan bezala, Urduliz Rurala eta Sopelako SUSAN elkarteek sortu genuen plataforma. Sopelako eta Urdulizko udaletako alderdi politikoek erantzun desberdinak eman zizkiguten: batzuek ez ziguten hitza eman, eta beste batzuek gure proiektuan sinistu zuten, EH Bilduk eta DB-TUk, batez ere. Eurak laguntza eskaintzen ari dira gaur egun, bileretan ekarpen baliotsuak egiten edo koordinazio-lanak egiten. Hala ere, argi utzi behar dugu gure izaera apolitikoa dela; bestelako alderdiak ez daude gurekin eurek ez dutelako nahi izan. Era berean, udalerri bi hauetatik aparte, Mungialdea, Plentzia, Gorliz eta beste hainbat udalerritako jendearen laguntza jasotzen ari gara gaur egun.

Hainbat galdera mahaigaineratu dituzue ospitale horren inguruan…

Bai; galderak dagozkien erakundeei zuzendu dizkiegu. Gu guztiz seguru gaude erakunde horiek, Osakidetza zein Eusko Jaurlaritza barne, planifikazio koordinatu bat eduki beharko zuketen, baina ez dugu koordinazioa hori inondik ikusten.

Zein izan da erakunde guzti horien erantzuna?

Udalen erantzunak oso eskasak izan dira; Plentzia, Bakio eta Lemoizko udaletako erantzunak baikorrak eta lagungarriak izan ziren. Bestalde, Metro Bilbaok eta Bizkaibusek esan zuten ez zutela aurreikusi maiztasunak areagotzea. Halaber, Arartekoari bitartekotza-lanak egitea eskatu diogu, baina ez dugu erantzunik jaso. Batzar Nagusietan ere entzunaldi bat eskatu nahi dugu; eta horretarako, zer nolako baldintzak eta pausuak eman behar diren jakiteko informazioa biltzen ari gara orain.

Zein da plataformaren helburua? GEHIAGO IRAKURRI SAKATU

Hitzez hitz berrezten dugu HIRUKAk argitaratutakoa

HIRUKAk jakinarazten du: argitaratutakoak gezurrak direla

EL CORREOk pasa den eguenean argitaratutako informazioaren harira (gerora zuzendu behar izan zuena), eta Sopelako alkatearen adierazpenak jaso zituenez, gerora alkateak berak prentsa-oharrez gezurtatu bazituen ere, HIRUKAren izena eta egitekoa aipatua eta zalantzan jarri izan direnez, HIRUKAk jakinarazten du: argitaratutakoak gezurrak direla.

Batetik, Sopelako Komunikazio Kabinete zerbitzuaz arduratu da HIRUKA, eta kontratua indarrean izan du une oro: 2015eko irailetik azarora 3 hileko kontratuagaz, eta ordutik urtarril bitartera hilez hil sinatutako kontratuakaz. Lehenago, HIRUKAren aurrerakari zen UK aldizkariari lehiaketaz egokitu zitzaion bitan (bakoitza 2 urteko iraupenagaz denera) Sopelako Komunikazio Kabinetearen zerbitzua ematea; azken kontratazioa 2015eko uztailean amaitu zen. Horregatik, UK-k beste eragile batzuekaz, 2015eko urtarrilean HIRUKA abiatu zuenez, Sopelako Udalak hala eskatuta, lehiaketa berriaren deialdia egin bitartean, HIRUKAk bere gain hartu zuen zerbitzuaren ardura, irailetik urtarrilera.

Bestetik, Komunikazio Kabineteaz aparte, Sopelako Udalak beste enpresa bategaz zuen kontratatuta udal webgunearen kudeaketa; horrekiko egoerak ez du geugaz zerikusirik. HIRUKAk edukiak ekoizteko eta hedatzeko ardura zuen, eta alde horretatik, bai webgunea eta baita youtube kanala ere informazio-edukiz hornituta eta jardunean egon dira urtarrilera arte. Sopela TBera (webgunean) bideoen lotura egitea eta webguneko beste arlo batzuk eguneratzea ez da egon gure esku.

Azkenik, HIRUKAk ez du bere burua aurkeztu Sopelako Udalaren Komunikazio Kabinete Zerbitzua eskaintzeko lehiaketara, ez dituelako betetzen ezarritako baldintza berrietako batzuk (4 urteko antzinatasuna eta 100.000 euroko negozio-fakturazioa gutxienez).

Hala, Sopelako Komunikazio Kabinete zerbitzua eskaini dugun tarte osoan, kontratupean, horretan zehaztutakoari jarraituz, unean uneko gobernu-taldearen eskaeren esanetara eta profesionaltasunez jardun dugu.

Inoren lana eta jarduna ezbaian ipini aurretik, edo okerrago, salatu baino lehenago, adierazitakoa egiaztatzea eginbeharra da. Edonork HIRUKAk baieztatutakoak egia diren frogatu gura izanez gero, hurbil dadila gurera, kontuak zuzen, argi, eta zehatz dauzkagulako.

Mentiras para justificar la desaparición de los videos de la pag. web municipal

Unai del Burgok (@unai_delburgo)sinatzen du (Sopelako EHBilduko Ekonomia taldeko kidea)

Zergatik izan behar dute zergek progresiboak?

Udalek eskumen gutxi dauzkate zergen alorrean. Hego Euskal Herriaren kasuan, eskumen gehienak Foru Ogasunek dauzkate. Hala ere, udaletatik gauzak egin daitezke eta ikuspegiak argi. Zergen progresibitatearen alde egin behar dugu. Zergatik? Zergek ezin dutelako kaltetu errenta maila apalagoa dauzkaten pertsonak. Errenta­maila eta erosteko gaitasun altuena dutenek gehiago ordaindu behar dute. Gaur egungo sisteman, udalek zergen eta tasen bitartez finantzatzen dute beraien burua. Gehiago daukatenek ekarpen handiagoa egin behar diote herri ogasuneri. Hori da gure planteamendua.

Abenduaren 12an argitaratu genuen arazoak izan genituela Web guneko serbidorearekin; horren ondorioz hainbat artikulu “desagertu” ziren (azaroaren 4tik abenduaren 12ra artekoak).

Orain jakinarazi nahi dugu izandako arazoak konpondu ditugula, eta epe horretako artikulu guztiak berreskuratu ez ditugun arren, gehienak bai eta irakurgai daudela sopela.net-en.

Berreskuratutako artikulu guztien hasieran originalaren argitaratze data ipini dugu, dena dela, artikulu horien Twitter eta Facebooken lotura zahar guztiek errakuntza adierazten dute. Lotura berriak erabili behar dira nahi izanez gero.

Sopela.net astiroago ibiliko da irailera arte. Alde batetik, herrian sortzen diren albisteak murrizten dira uda garaian eta bestetik Sopela.net-ek ere “oporrak” hartzen ditu.

Dena dela, albisteak murrizteak eta oporretan egoteak ez du esan nahi “deskonektatzea”, beraz  adi egongo da Sopela.net eta zerbait argitaratzeko moduan suertatuko balitz, saiatuko web orrian islatuko da… adibidez: datorren asteko ostegunean, hilak 30, plenoa izango da…

Hona hemen Fracking EZ! Taldeak irakurritako pregoia hitzez hitz… merezi du:

Sopeloztarrok, gaur da gure eguna!

Jaietan murgildu nahi dugu, giro euskaldun, parekide, herrikoi eta parte-hartzaile batean. Aurten ere, denen artean, jai koloretsu eta garbien aldeko apustua egingo dugu, auzokideenganako errespetua eskatuz.

Gure sustraien garrantzia azpimarratu nahi dugu aurtengo jaietan. Natura daukagun altxorrik preziatuena da, hortaz, maitasunez zaindu beharrekoa dela uste dugu. Kontziente izan behar gara honek duen garrantziaz, gure Euskal herriko kostaldeak eta bazterrak babestea ezinbestekoa dugulako. Horretarako hemen gaude FRACKING EZ! Sopelako taldea jaiei hasiera emateko.

Sopelan FRACKING EZ! Taldea helburu argi batekin sortu zen: Fracking-a eragoztea, Sopelan eta beste leku guztietan. Gure helburuetako bat gaitzezpen soziala erakustea da, ezin izango direlako herritarron gainetik pasatu. Ama lurra guztiona da, beraz, erabakia ere guztiona izan behar du!.

Agerian dago, guztion elkar lanari esker, azkeneko urte hauetan, Sopela eta Larrabasterrako jaiak, kalitatekoak bilakatu dugula. Lehenik eta behin, Jai Batzordea zoriondu nahi dugu, gogoz eta ilusio handiz dihardutelako jaien prestaketan eta urtero indarberritzen direlako, herriko jai hobeak sortuz. Zuek barik, jairik ez! Beraz benetan eskerrak Jai Batzordeari guzti hau posible egiteagatik eta Fracking Ez! Taldeari pregoilariak izateko aukera emateagatik! Elkarte eta talde guztiak ere zoriondu nahi ditugu, jaietarako prestakuntzan izandako ilusioagatik eta parte hartze zabalagatik. Azkenik, Ugeraga futbol taldea, Lointek Team eta Sopela Ugeraga txirrindulari taldea zoriondu nahi ditugu aurtengo denboraldiagatik.

Amaitzeko, jaietan zehar gerta litezkeen erasoak ekiditeko lan egingo dugu, eta edozein motako jazarpenak gaitzetsiko ditugu. Honetaz aparte, gaur egun jasotzen ditugun eraso judizialak salatu nahi ditugu, gure babes beroena itxi nahi duten Mikelats Herriko Tabernari. Herriko Tabernak LIBRE eta zabalik!

Jaiak goza ditzazuela espero dugu, herriko bazter guztiak umore onaz betez, urrun dauden horiei ere irits dakien gure alaitasuna!

Gaur da gure eguna! Gora Sopelako jaiak! Gora Sopela!

Badirudi  euskal herritarrok afizio onenaren fama dekogula, Euskaltelen aldeko marea laranja eta, nola ez, asteburu honetan egondako jendetza txuri-gorria. Ez hori bakarrik, izugarria izan da kolore hauen presentzia Bizkaia osotik. Ospitaleak, udaletxeak, dendak, garraio publikoak, balkoiak … danak Athletic-en bandera edo koloreekin jantziak, benetan ikusgarria eta gozagarria euskal afizioa hau. Baina non ote dago jende hau gizartearentzat garrantzitsuak diren aldarrikapenetan?

Ez naz futbolaren inguruan dabilen negozioaren inguruan jardungo, baina bai jarraitzaileen lehentasun edo koherentzia faltaz. Kuriosoa da oso jendeak nola  futbol talde baten inguruan hartu dezakeen konpromiso maila, baina bere inguruan gertatzen ari diren injustizien inguruan duten axolagabekeria. Maiatzaren lehenean eta emakumearen egunean, adibiderako,  kaleak gorriz edota morez betetzen al dira asteburu honetan lez? Jakinda egun hauek sinbolismoaren barruan jausten direla, ”itxurazko” gutxieneko hauek ere ez dira betetzen.

Gainera kamiseta bera eramatearen berdintasunaren inguruko diskurtsoak entzun behar izan ditugu gure EITB maitatuan. Alde bateko eta besteko politikariak eskua emanda partidua ikusten, Euskal Herriko langileri eta gazteak geroz eta egoera prekarioagoan daudenean.

Guzti honen harira, haien erantzuna beldurgarria egiten zaizkidan pare bat galdera etortzen zaizkit burua, zergatik gertatzen da fenomenoa hau? eta Zer irabazten du herriak Athletic-en garaipenarekin?

Nik nire erantzun propioak argi dauzkat baina idatzi honen helburua ez da mesias baten rola hartu eta egia absolutuen klase magistral bat ematearena, baizik eta hausnarketa propiorako gune edo aitzakia izatea. Argi dago futbola aspalditik langileriari ostutako kirola dala eta berreskuratzeko behar bat badagola, honekin batera gizarterako garrantzitsuak diren ekintza ezberdinak jorratuz.

Langileen futbolaren alde, langileen konpromisoaren alde!

Sugaar

Sopelako EHBilduk udal hauteskundeen lehen balorazioa egin du eta alderdi guztiekin hitz egingo duela iragarri du.

Sopelako EHBildu jakitun da ez duela jaso herritarron gehiengoaren babesa nagusia eta beraz ez diola Alkatetzari modu zuzenean eutsi.

Horren zergatian hainbat arrazoi aipa daitezke, eta haien artean EHBilduk orokorrean egindakoa analisiarekin bat egiten da Sopelan: jendea eta kalearekin harreman estuagoa eta lasaiagoa edukitzeko dedikazioa agian ez da nahikoa izan, nahiz eta Gobernu lanean gogor aritu eta gauza asko ondo egin.

Gainera, Sopelako botere faktikoekin izandako talkaren eragina ukaezina da Sopelako EHBilduren ustez. Aldaketa bultzatzeko orduan Sopelan 30 urtetan botere faktikoak izan direnekin talka egon da eta boikota eta oztopoak jartzeko joera nabarmena izan da irudi gatazkatsua zabalduz eta kostea eraginez.

Are gehiago, gutxiengoan aritzea eta oposizioaren aldetik izandako blokeo irmoak ere eragina izan du. Irudi kaxkarra saldu nahi zuten eta egun errealitatea izango ziren proiektuak geldiarazi dituzte. Adibide aipagarri moduan esatea, PNV-PSE eta PPk azken plenoan Gizon eta Emakumeen arteko berdintasuna bultzatzeko ordenantzaren aurka bozkatu zutela.

Azkenik, honi guztiari eraso informatibo itzela gehitu behar zaio: akatsak erabat handituz eta berrikuntzak zein lorpenak gutxietsiz. Kanpainan bertan gezurretan murgildu dira, atez ate sistemaren inguruan zabaldutakoa lekuko esanguratsuena izan da.

Dena dela 2000 bozka

EAJk irabazi du, dena dela nabaria geratu da sopeloztarron gehienak ezkerrekoak eta abertzaleak direla, EHBILDUn bat egiten duten oinarri ideologiko biak hain zuzen ere. Are gehiago, nahiz eta ez den eskuratu duela lau urteko emaitzak EHBILDUk bere eremu elektoral ia osoa mantendu du, ia 2000 bozka.

Beste indar aurrerakoiak sakabanatuta eta mesfidantza

Ezkerreko beste eskaintzak erabat sakabanatuta egon dira, nahasmena eta mesfidantzak sortuz. IRABAZI izan da eskaintza argiena, baina ez du udaletxean sartzerik lortu. Ondoan PODEMOS inguruan bi zerrenda aurkeztu dira. Hauek biak ordezkaritza lortu dute, baina haien arteko iskanbilak eta herrian bolo-bolo dabiltzan zurrumurruak DENOK BATERA zerrendaren inguruan, zalantzak baino ez dituzte sortarazten etorkizunari begira. DENOK BATERA kandidaturaren inguruan gauza larriak entzun dira: interes pertsonalak eta urbanistikoak dituzten pertsonak badaudela… udalean botere faktikoak diren batzuk ere kandidatura honen bultzatzaileak direla… PODEMOS alderdiaren kontrol organoek azalpen bat zor diote Sopelako boto emaile guztioi EHBilduren ustez. ORAIN SOPELAren inguruan ere mesfidantzak daude eta argitzea beharrezkoa da. Beraz, “aurrerakoien” eremu honetan anabasa handia dago erabakigarriak izan daitezken zinegotziekin. PSE-EE txiripaz sartu da udalean eta PP ez.

EHBILDUk alderdien arteko kontaktuen erronda bati hasiera emango dio

EHBILDUk 6 zinegotzi ditu, Podemos inguruan dauden bi zerrendek 3 (2 Denok Batera-Todos Unidos eta 1 Orain Sopela) eta PSE-EEk 1. Kopuru hauen inguruan aukerak egon daitezke eta EHBILDU, hurrengo egunetan, alderdi guztiekin bilduko da eta ondoren Herri Batzarra deituko du informazioa partekatzeko eta azken erabakiak hartzeko. Aukerak egon daitezke Sopela ezkerretik eta abertzaletasunetik eraikitzen jarraitzeko eta EHBILDUk aukera horiek bultzatuko ditu.

EHBILDUK konpromiso irmoa adierazten du autokritika sendoa egiteko, lau urte hauetan ondo egindakoa eta aurreratutakoa trinkotzeko eta sopeloztar guztiekin harremanak sendotuz Sopela abertzalea, ezkertzalea, ekologista, feminista eta bizia eraikitzen jarraitzeko.