Sopela.net astiroago ibiliko da uztailean eta abuztuan. Alde batetik, herrian sortzen diren albisteak murrizten dira uda garaian eta bestetik Sopela.net-ek ere “oporrak” hartzen ditu.
Dena dela, albisteak murrizteak eta oporretan egoteak ez du esan nahi “deskonektatzea”, beraz Sopela.net adi egongo da eta suertatuko den guztia web orrian islatuko da.
2016ko urtarriletik 30.000 bisita inguru jaso ditugu. Argi eta garbi, tendentzia gora doa: pasadan urteko datuekin konparatuz, ia %16ko joera gorakorra izan du bisitetan.Datu hauek 2009an sorturiko proiektua errotuta dagoela konfirmatzen dute, ilusioz Sopela informatzen jarraitzeko.
Gaur egungo sare sozialetako datu batzuk:
Twitterren : 472 jarraitzaile
Facebooken : 144 jarraitzaile
Telegram Kanalean : 39 lagun
Euskarari buruzko datu interesgarri bat : @Sopelanet Twitter kontua analizatuta artikuluen %71a euskaraz idatziak direla dio.
Gure Esku Dago-k “Herri bat gara, Erabakitzeko eskubidea dugu” aldarrikapenarekin bat eginez, Euskal Herriko hainbat eta hainbat herritan Herri Kontsultak antolatu ditu.
Bizkaiko Hitza agerkariak elkarrizketa egin dio Sopelako talde sustatzailearen partaidea den Anjel Artaberi (2016ko ekainaren 3an).Sopela.net-ek bere osotasunean argitaratzen du Bizkaiko Hitzak Anjeli egin dion elkarrizketa.
Ados jarri dira Uribe Kostako herritarrak. Eta adostasun horri eguna ere jarri diote: 2017ko apirilaren 2a. Orduan egingo dute etorkizunari buruzko herri galdeketa Urduliz, Lemoiz, Sopela eta Barrikan. Eta sortu berri duten Ados Uribe Kosta elkartea izango da prozesuaren bultzatzaile nagusia. 150 lagunek osatzen dute elkartea gaur-gaurkoz, baina herritarrei irekita dagoen taldea dela azaldu du Anjel Artabe partaideak (Sopela, 1958).
Nola izan da galdeketara deitzeko prozesua?
Eskura prozesua egin genuenetik erronka nagusi bat izan genuen eskualdean: erabakitzeko eskubidearen aldeko adierazpenekin zer egin pentsatu. Eztabaida luzea izan genuen, eta bidea beste era batean egitea erabaki genuen. Iruditu zitzaigun herri galdeketa antolatzea askoz aproposagoa zela adierazpenaren barruan lan egitea baino. Eta erabakitzeko eskubidearen adierazpena herri galdeketaren parte gisa jarri dugu. Hori guztia egiteko sortu da Ados Uribe Kosta elkartea.
Nolakoa izan da batzordearen eraketa?
Batzorde sustatzailea osatzeko zerrenda luzea osatu genuen eskualdean. Herri mugimenduetako, elkarteetako eta bestelako eragileetako partaideekin hitz egin genuen, eta baita norbanakoekin ere. Talde sustatzailean ahalik eta aniztasun handiena biltzea izan zen gure helburua hasieratik, eta oso profil ezberdineko herritarrengana jo dugu horretarako. Herritarrekin hitz egin ondoren jo genuen alderdi politikoetara, eta, oro har, ona izan da egitasmoaren inguruan izan duten jarrera. Esparru guztiekin berba egin ondoren egin genuen talde sustatzailea osatzen dugunon bilera. 150 pertsonako taldea gara orain, baina parte hartzea ez dago itxia inondik inora ere.
Herritarrak lanerako gogoz azaldu zaizkizue?
Talde sustatzailean izateak zer-nolako konpromisoa eskatzen duen galdetu digute askok. Eta konpromisoa norbere aukeraren araberakoa dela erantzun dugu beti. Prozesu honetan, ez dago gutxienekorik, gutxieneko guztiek gehitu egiten dutelako, eta denek dute tokia batzordean. Taldea osatu ondoren, aurkezpen publikoa prestatzen hasi ginen. Hori izan da orain arteko zailena, testua guztien artean adosten aritu baikara. Ordu asko eman dugu horretan, baina oso pozik gaude emaitzarekin.
Eskualdeko zenbait herritakoak elkartu zarete batzordean. Kudeaketa errazten du horrek?
Goierriko esperientziari arreta handiz erreparatu diogu, eta han egin dituzten urratsei begira egon gara. Uribe Kostako herriak ezberdinak dira, bai. Baina, soziologikoki, nahiko antzekoak dira denak. Plataformak hitzaldiak egin dituenean, antzeko gauzak entzun ditugu herri gehienetan.
Zeintzuk dira galdeketak egin arte egingo dituzuen urratsak? irakurtzen jarraitzeko SAKATU–> GEHIAGO IRAKURRI
Egun hauetan, komunikabide guztietan albistea izan da gure herria Estatu Batuetatik Sopelaraino helduko den Facebook eta Microsoft-en itsaspeko kableagatik. Albiste honetaz hitz egiteko Juan Mª Sanchez, EHBilduko zinegotziarekin elkartu gara…
Prentsan agertu den informazioaz gain, baduzue datu gehiagorik?
Egia esateko oso datu gutxi dugu gai honetaz. Udalaren batzorde informatiboetan ez da honetaz hitzik esan, eta maiatzaren 30ean, egin genuen plenoaren bukaeran, erregu eta galdera sailean, gaia mahairatu zen. Gobernu Taldearen esanetan prentsan agertu dena baino askoz gehiago ez dago; beraz, une honetan oso azaleko informazioa dugula onartu behar dugu.
Azalekoa, baina zenbait datu izango dituzue…
Lehenengo eta behin esan behar da, gaur egun jadanik, badagoela gure herrira Bretainia Handitik heltzen den beste kable bat. Aspaldiko kable honen azpiegitura baliatuz lehorreratuko da egun hauetan puri-purian dagoen Facebook eta Microsoft-en itsaspeko kablea, horrela konexioak errazagoak eta merkeagoak izan daitezkeelako. Uste da kablea 2017an helduko dela Sopelara, Arriatera hondartzara hain zuzen ere.
Eraginik izango al du kable honek Sopelan?
Gaur egun Bretainia Handitik Sopelara heltzen den kableak ez dio ekarpenik egiten gure herriari: ez dirurik zergen bidez, ez lanposturik… eta datorren urtean helduko denak gauza bera. Sor litekeen enplegu bakarra kablearen kontrol gunea kokatuko den tokian izango da, bertatik jardunak eta matxurak kontrolatuko eta errepetidoreak monitorizatuko direlako.
Ingurugiroan inpakturik?
Kablea zuntz-optikoa da eta Telxius-ek kudeatuko du, Telefonika taldeko filialak. Itsas hondoko azaletik dator eta kostaldetik 1500 metrora lurperatuko da. Ditugun informazio apurraren arabera, kablea lehorreratuko da Arriateran, hondartzaren harearen azpitik 10 metroko sakontasunean Telefonikak gaur egun dituen kabletegiarekin lotzeko Sopelako eliza ondoko Telefonikaren eraikuntzara heldu arte. Teorian behintzat, ez da inpakturik egongo, baina gertutik jarraituko dugu gaia.
Gaur ostirala, maiatzaren 27an, kotxe karabana batek Sopelako eta Urdulizko kaleak zeharkatuko ditu ospitalearen irekiaren ondorioz herri hauen herritarrek nozituko duten trafiko hazkundearen “simulakroa” egiteko. Kotxe karabana Uribe Ospitalea Herri plataformak antolatu du, eta ekimen honen helburua herritarrak eta ospitalearen arduradunak sarbide duinen beharraz kontzientziatzea da. Kalkuluen arabera 4200 kotxe gehiagok zeharkatuko dute egunero Sopela eta Urduliz.
18:30ean Urkon
Kotxe karabanaren abiapuntua Urkoko aparkalekua izango da, eta hitzordua 18:30ean.
Argazkian: egingo den bidea
Kaleraketak… expedientes de regulación de empleo… flexibilidad laboral… pribatizazioak… jubilación a los 67 años… zabor kontratuak… gazteen aukera bakarra atzerrira joatea… mutuak… externalizazioak… azpikontratazioa… imposibilidad de conciliar vida laboral y vida familiar… soldaten murrizketa… trabajo sin cotizar… kongelazioak… lan istripuak… langabezia… prekarietatea… lanaldi partzialak… horas extras obligatorias sin cobrar… ordezkorik ez… discriminación salarial mujeres-hombres… enpresen itxiera… deslokalizazioa… baja izateko eskubiderik ez… lan erreformak… un trabajo no asegura salir de la pobreza…
Hamaika arazo, hamaika arrazoi Maiatzaren Lehena ospatzeko, Maiatzaren Lehena borrokatzeko, LANGILEOK MARTXAN eskuBIDEAK aktiBATUZ!
Gaur (apirilak 7) SER irrati kateak solasaldi interesgarria emititu du Urdulizeko ospitaleaz. Solasaldian plataformako kideek hartu dute parte, Sopela eta Urdulizeko hainbat bizilagunek, sindikatuen ordezkariak eta EHBildu eta DBTU zinegotziek.
SER irratiko esatariak esan duenez Osakidetza eta Sopela eta Urdulizeko alkateak ere gonbidatuak izan dira solasaldian parte hartzeko, baina uko egin diote gonbidapenari.
Solasaldia 30 minutukoa izan da eta gaztelaniaz entzun daiteke SER katearen web orrian: Vecinos y vecinas de Uribe Kosta muy preocupados
