Irailaren 27an Gudari Eguna ospatzen da eta Sopelako kaleetan hildako hiru sopeloztarren argazkiak eta biografia txikia daramatzaten kartelak jarri dituzte.
Karteletan David Alvarez Peña, Mario Alvarez Peña eta Iñaki Aurrekoetxea Zubillagaren inguruko informazioa agertzen da. David Alvarez Lemoizko zentral nuklearraren aurkako ekintza batetan zauritu zuten eta Basurtuko ospitalean hil zen. Bere senideek Guardia Zibilaren eskutik jaso zuen jazarpenagatik hil zela salatu zuten. Mario Alvarez, Daviden anaia, komando kideekin zegoela istripu bat eduki zuen eta granada batek eztanda egiterakoan eragin zizkion zauriak oso larriak izan ziren eta bertan hil zen. Iñaki Aurrekoetxea, “Sope”, erbesteratu zen eta Iparraldean gaixorik jarri zen. Gaixotasun horren ondorioz hil zen.
Karteletaz gain, hirurak gogoratzeko haien lagunek bideo hau zabaldu dute.
{youtube}gxiRDrw6wBo{/youtube}
Etengabe agerkari digitalak informatu duenez, Madrilen epaitzen ari diren Uribe Kostako 11 gazteek haien kontra botatako akusazioak ukatu dituzte.ETArekin inolako loturarik ez dutela aipatu dute eta leporatzen dizkieten kale erasoetan parte hartu izana ukatu dute.
Gazteen deklarazioa amaitu eta akusazioaren txanda hasi da. 16 poliziek deklaratu dute, eta agerian gelditu da akusazioaren oinarria: poliziek akusatuak ezagutzen zituztela, handik ikusi zituzten… eta holakoak esan dituzte. Epaileak berak polizia bati errieta ere egin dio emandako erantzunengatik.
Gaurko saioa goizez eta arratsaldez egin dute. Bihar akusazioaren lekukoen deklarazioekin jarraituko da epaiketa. Datorren ostiralean epaiketa hau dela eta protesta egiteko mobilizazio deitu dute Algortako Telletxen arratsaldeko 20:00etan.
Auzitegi Nazionalak Askapenako bost kideren aurkako auzibidea abiarazi du: Walter Wendelin, Unai Vazquez, David Soto, Aritz Ganboa eta Sopelarekin lotura handia duen eta Sopela.net agerkariaren laguntzailea den Gabi Basañezen aurka.
Lagun hauek 2010eko irailaren 28an atxilotu zituzten, Itsaso Lekuona eta Ruben Sanchezekin batera.
Atxiloketa hauek oihartzun berezia izan zuten Sopelan, hain zuzen ere, Sopelako Gernikako akordioaren sinatzaileek eta herriko pertsona eta talde ugarik (surflariak, bertsozaleak, euskaltzaleak, ikastolako gurasoak eta langileak, Bilboko konpartsakideak) hainbat mobilizapen antolatu zituzten eta plenora eraman zuten Gabiren aldeko mozioa.
Bermeak ordainduta aske geratu zenean, herrian Gabiri eta beste sopeloztar bati (Iontxuri) egindako ongi etorrian ertzaintzak basatiki kargatu zuen bildutakoen aurka lau zauritu eraginez. Karga hau Sopelako plenoak gaitzetsi zuen.
Asko dira egun hauetan Sopelako bazter, txoko eta leku zoragarriez gozatzen ari diren atzerritarrak. Seguruenik irudi, argazki eta oroitzapen onak eramango dituzte haien etxeetara. Baina zoritzarrez, gure herria gatazka politiko batean murgilduta dago, estatu espainolak eta frantsesak Euskal Herria irenstea eta asimilatzea helburu zuzena baitu, horregatik egun hauetan, Sopelako Ezker Abertzaleak ekimen propagandistikoak lantzen ari da turistei egoeraren berri jakinarazteko.
Ingelesaz, frantsesaz eta gaztelaniaz ongi etorria eta Euskal Herrian daudela ohartzeaz gain, herri honen erabakitzeko eskubidea ukatzen ari dela azaltzen zaie, banatzen ari diren esku orri eta pankarten bitartez.
Azken egun hauetan Larrabasterrako biribilgunean pintada faxistak agertu dira. BILDUren kartel zahar baten gainean “asesinos” eta ondoko trafiko ikur baten gainean “esto es España” margotu dute. Pintadak anagrama faxista ezagun batekin sinatu dituzte. Euskal Herrian zein Europa osoan Noruegan gertatutako sarraskia faxistaren harira horrelako erasoak biderkatzen ari dira.
Pintada hauek duten mezua eta PP alderdiak zein PSOEko eledun batzuek BILDUrekiko erabiltzen ari diren mezua berdina dela azpimarratu behar da. Pintada gutxi izan dira baina argi dago indarra hartzen ari den mugimendu faxista orokor baten aleak direla.
Gaur eguerdian Sopelako hondartzan 100 bat lagun bildu dira preso politikoen eskubideen aldeko mobilizazioa burutzeko. Manifestariak hondartzan zehar ibili dira presoen aldeko aldarrikapenak zabaltzen eta pairatzen duten egoera azaltzen zituzten paperak banatzen.
Sopelan ez ezik Euskal Herriko beste hondartzetan eta lekuetan mobilizazio ugari burutu dituzte presoen alde.
